Cybernet şirkətinin nümayəndələri Honkonqda keçirilən Beynəlxalq Sərgidə iştirak etmişlər

Bu ilin aprelində Cybernet MMC nümayəndələri İKT sənayəsinin Asiyada tanınmış və nüfuzlu hadisəsi olan tədbirdə - Honkonqda keçirilən Beynəlxalq İnformasiya və Telekommunikasiya Texnologiyaları Sərgisində iştirak etmişlər. Tədbir ənənəvi olaraq hər il 13-16 aprel tarixlərində keçirilir. Tədbirin təşkilatçısı Honkonq Ticarətin İnkişafı Şurasıdır. Tədbirin proqramına dünyanın aparıcı alim və tədqiqatçılarının iştirakı ilə təqdimatlar, seminarlar daxil idi. Sərgilənən məhsulların əsas kateqoriyalarına: proqram təminatı, sabit və mobil şəbəkələr, korporativ şəbəkələr, avadanlıq, rəqəmsal və multimedia texnologiyalar, habelə logistika və pərakəndə ticarətdə, təhlükəsizlik sistemlərində innovativ elektron və İKT həll vasitələri və s. daxil idi. Bu il sərgi pavilyonlarının ümumi ərazisi təxminən 7000 kv.m təşkil etmiş, sərgidə 90 ölkə və regiondan 800 şirkət iştirak etmiş, tədbiri 120 ölkədən 31000 qonaq ziyarət etmişdir.