"Cybernet" şirkəti tələbələrə təcrübə keçmək üçün dəyərli imkanlar yaradır
23 iyul 2014-cü il
"Cybernet" şirkəti İnformasiya Texnologiyaları sahəsinin inkişafına və gənclərə dəstək məqsədilə növbəti dəfə İT üzrə təhsil alan tələbələrə təcrübə keçmək üçün imkan yaradıb. Azərbaycan Universitetinin Kompüter elmləri və Kompüter mühəndisliyi fakültəsində oxuyan 40-a yaxın tələbə "Cybernet" şirkətində iyul ayı boyunca davam edən təcrübə proqramında iştirak edirlər. Tələbələr təcrübə müddətində "Cybernet"in uğurlu layihələri əsasında əyani şəkildə sistem və şəbəkə, məlumat bazası, proqramlaşdırma və yardım masası barədə öyrənirlər.
Qeyd edək ki, şirkət tələbələrin təcrübədən maksimum dərəcədə faydalanması üçün aparıcı mütəxəssislərini təlimə yönəltmişdir. "Cybernet" şirkətinin Aparıcı Sistem Administratoru Aydın Əliyev bu cür mütəxəssislərdən biridir. O, təcrübəyə gəlmiş qruplara əməliyyat sistemləri, fayl sistemləri, kompüter sistem blokunun qurğuları və iş prinsipləri, əməliyyat sisteminin şəbəkə konfiqurasiyası və proqramlaşdırma sahəsindən təlim keçir. Təcrübə keçən tələbələrin mühazirələrə yüksək maraq göstərdiyini deyən Aydın Əliyev onların sual-cavablarda fəal iştirakını İT sahəsinə və proqramlaşdırmaya yüksək maraqlarının olması kimi qiymətləndirdi.
Kompüter mühəndisliyi fakültəsinin 3-cü kurs tələbəsi Aydın Mazanov təcrübə keçən tələbələr arasındadır. O, təcrübəyə başlamazdan qabaq Azərbaycandakı İT şirkətlərin işi barədə məlumatının olmadığını, daha çox vebdizayn şirkətləri ilə maraqlandığını bildirdi. "Cybernet" kimi iri və mürəkkəb layihələr həyata keçirən şirkətlərdən az məlumatlı olan Aydın təcrübə boyunca mütəxəssislərə qulaq asıb, görülən işlərlə tanış olduqca bu sahəyə marağının daha da artdığını qeyd etdi.
Nəzərinizə çatdıraq ki, keçən il Elektron Xidmət Həlləri üzrə “İlin İT şirkəti” adına layiq görülmüş "Cybernet" hər il tələbələr üçün bu cür təcrübə imkanı təşkil edir. Şirkət bununla yanaşı mütəxəssislərinin universitetlərdə İT sahəsində seminar və mühazirələrini də təşkil edir.
"Cybernet" MMC Azərbaycanda İnformasiya Texnologiyası xidmətləri və həlləri təqdim edən aparıcı şirkətlərdən biridir. Proqram Təminatının Yazılması, Sistem Arxitekturasının Hazırlanması, İT infrastrukturun qurulması ilə məşğul olan şirkət Dövlət, Bank və korporativ idarəetmə, maliyyə, telekommunikasiya, iri və orta müəssisələrdə qabaqcıl proqram və aparat həllərinin tətbiqi, təkmilləşdirilməsi, texniki dəstək və inteqrasiyası kimi xidmətlər təklif etməklə, əsasən, elektron xidmətlərin təşkili üzrə ixtisaslaşıb.
"Cybernet" 2011-ci ildə Azərbaycanda fəaliyyət göstərən ən iri yerli investisiya holdinqlərindən biri olan "Synergy Group"un üzvü olmuşdur. Nəticə olaraq Qrupun strateji dəstəyi və digər biznes-istiqamətləri ilə birləşmə gücü şirkət qarşısında yeni sahələrə aid bazarların açılmasına, məhsul, xidmət və səlahiyyət spektrinin genişlənməsinə, əməkdaşlığın yeni forma və üsullarını təklif edərək bazarda kompleks innovativ layihələrin hazırlanması və inkişaf etdirilməsinə imkan yaratmışdır.
"Cybernet" MMC-nin mürəkkəb proqram məhsullarının tətbiqi və inkişafı sahəsində fəaliyyəti həm Azərbaycan, həm də beynəlxalq təşkilatlar tərəfindən tanınıb. 2007-ci ildə şirkət hazırladığı məhsula görə“İntelekt” mükafatı, 2010-cu ildə yubiley medalı ilə və 2013-cü ildə “İlin İT şirkəti” seçilib, bir sıra beynəlxalq hesabatlarda adı hallanıb.
